«Tottenxem» jamoasining markaziy himoyachisi Kristian Romero faoliyatini boshqa klubda davom ettirishga yaqin turibdi. Jurnalist Gaston Edulning xabar berishicha, 27 yoshli argentinalik futbolchi joriy mavsum yakunlangach, yozda «shporlar» safini tark etadi.
Ma’lumotlarga ko‘ra, avvalgi transfer oynalarida ham himoyachiga Ispaniya La Ligasi va yana bir noma’lum chempionat vakillaridan takliflar bo‘lgan. Jahon chempioni hisoblangan Romero 2022 yildan buyon «Tottenxem» sharafini himoya qilib kelmoqda.
Hozirgi vaqtda futbolchining klub bilan amaldagi shartnomasi 2029 yilgacha mo‘ljallangan. Transfermarkt portali Kristian Romeroning transfer qiymatini 60 million yevroga baholagan.
