«Тоттенхэм» жамоасининг марказий ҳимоячиси Кристиан Ромеро фаолиятини бошқа клубда давом эттиришга яқин турибди. Журналист Гастон Эдулнинг хабар беришича, 27 ёшли аргентиналик футболчи жорий мавсум якунлангач, ёзда «шпорлар» сафини тарк этади.
Маълумотларга кўра, аввалги трансфер ойналарида ҳам ҳимоячига Испания Ла Лигаси ва яна бир номаълум чемпионат вакилларидан таклифлар бўлган. Жаҳон чемпиони ҳисобланган Ромеро 2022 йилдан буён «Тоттенхэм» шарафини ҳимоя қилиб келмоқда.
Ҳозирги вақтда футболчининг клуб билан амалдаги шартномаси 2029 йилгача мўлжалланган. Transfermarkt портали Кристиан Ромеронинг трансфер қийматини 60 миллион еврога баҳолаган.
