"Byornli" darvozaboni Martin Dubravka Angliya futboli tarixidagi eng buyuk darvozabonni e’tirof etdi.

Slovakiyalik posbonning so‘zlariga ko‘ra, "Manchester Yunayted"ning sobiq darvozaboni De Xea yosh kiperlarga yo‘l ochib, o‘z fazilatlarini ko‘rsatdi.

"U ajoyib yigit, juda quvnoq, birinchi kundanoq hayotimni juda osonlashtirdi. U bilan vaqt o‘tkazish oson edi, hamma narsa haqida gaplashib o‘tirardik. U juda xotirjam, ba’zan hatto haddan tashqari xotirjam bo‘ladi, buni o‘zi ham bilsa kerak! Biz hali ham aloqadamiz. Biz atigi bir necha oy birga bo‘ldik, lekin u shunchaki ajoyib inson.

Menimcha, uning holatida bu ayniqsa yaqqol sezildi, chunki o‘sha paytda yosh darvozabonlar unchalik ko‘p emasdi. Hozir Premyer-ligada yosh darvozabonlarni ko‘p uchratish mumkin, ammo o‘shanda murabbiylar tajribali o‘yinchilarni afzal ko‘rishardi. Aynan shuning uchun David birinchi yosh darvozabonlardan biriga aylandi va bu biz uchun juda ilhomlantiruvchi bo‘ldi", dedi Dubravka.

Ma’lumot uchun, De Xea 2011 - 2023 yillar davomida "Manchester Yunayted" sharafini himoya qilgan va 545 ta o‘yinda maydonga tushgan.