Shveysariya 2038-yilda bo‘lib o‘tadigan qishki Olimpiya o‘yinlarini qabul qilish uchun hozircha yagona nomzod bo‘lib turibdi. Bu haqda Milanda o‘tkazilgan Xalqaro Olimpiya qo‘mitasi (XOQ) sessiyasida qishki Olimpiya o‘yinlari mezbonini aniqlash bo‘yicha komissiya raisi Karl Shtoss ma’lum qildi.
Uning so‘zlariga ko‘ra, Shveysariyani 2038-yilgi qishki Olimpiya o‘yinlari mezboni sifatida rasman tasdiqlash masalasi 2027 yil aprel oyida bo‘lib o‘tadigan XOQ sessiyasida ko‘rib chiqilishi rejalashtirilgan. Buning uchun Shveysariya hukumati va parlamenti 2026 yil davomida Olimpiadani moliyalashtirish bo‘yicha yakuniy kelishuvga erishishi lozim.
Shtossning ta’kidlashicha, agar hozirgi muzokaralar tashkiliy masalalar bo‘yicha kelishuv bilan yakunlanmasa, XOQ o‘yinlarga mezbonlik qilish istagini bildirgan boshqa davlatlar bilan ham muzokaralarni boshlashi mumkin.
2038-yilgi Olimpiya konsepsiyasiga ko‘ra, musobaqalar uchta klasterda o‘tkaziladi. Ularning markazlari sifatida Lyusern, Sankt-Moris va Lozanna shaharlari belgilangan.
Ma’lumot uchun, 2026-yilgi qishki Olimpiya o‘yinlari 6–22 fevral kunlari Italiyada bo‘lib o‘tadi. 2030-yilgi o‘yinlarga Fransiya Alp tog‘lari mezbonlik qiladi, 2034-yilgi qishki Olimpiya esa AQSHning Solt-Leyk-Siti shahrida tashkil etiladi.













