Madridning «Real» klubi «Liverpul» markaziy himoyachisi Ibraima Konateni qo‘lga kiritish fikridan voz kechgani yo‘q.
Mish-mishlar fransiyalik futbolchini doimiy ravishda «qaymoqranglilar» safiga o‘tishi bilan bog‘lab kelayotgan edi, biroq o‘tgan yilning oxirida Ispaniya grandining qiziqishi biroz susaygandi. ESPN xabariga ko‘ra, agar «qizillar» markaziy himoyachisi maosh va bonuslar bo‘yicha talablarini kamaytirsa, yozga yaqin u yana madridliklarning transfer maqsadiga aylanishi mumkin. Eslatib o‘tamiz, 26 yoshli futbolchining «Liverpul» bilan shartnomasi iyun oyi oxirida tugaydi, shu sababli u erkin agent sifatida tekinga tushishi mumkin.
Ibraima Konate joriy mavsumda Arne Slot jamoasi safida 31 ta o‘yinda maydonga tushib, ikkita gol urishga muvaffaq bo‘ldi.













