«Liverpul» bosh murabbiyi Arne Slot ustuvorliklar borasidagi fikrlari bilan hammani hayron qoldirdi. Niderlandiyalik mutaxassisning fikricha, «qizillar» boshqaruvida u uchun sovrinlar yutishdan ko‘ra, chiroyli futbol namoyish etish muhimroq.
«Murabbiy sifatida siz chempionatda, Chempionlar ligasida, Angliya kubogi yoki Liga kubogida zafar quchishingiz mumkin, ammo siz qo‘lga kiritishingiz mumkin bo‘lgan eng katta g‘alaba — bu jamoangizning ko‘rish uchun eng yoqimli bo‘lgan futbol o‘ynashidir. Garchi hozirda muxlislar bu borada men bilan bahslashishlari mumkin bo‘lsa-da, men aynan shunga intilaman», — dedi Slot Reds Roundtable podkastida.
Eslatib o‘tamiz, o‘tgan mavsumda Arne Slot qo‘l ostida «Liverpul» Premyer-liga chempionligini qo‘lga kiritgan edi. Hozirda «qizillar» turnir jadvalida oltinchi o‘rinni egallab turishibdi.
