Kataloniyaning "Barselona" klubi Ferran Torresni jamoaning asosiy hujumchisi sifatida ko‘rishni rejalashtirmayapti. Bu haqda jurnalist Adrian Sanches xabar bermoqda.

Manbaning ma’lumotiga ko‘ra, "ko‘k-anorranglilar" 25 yoshli ispaniyalik futbolchi bilan mehnat shartnomasini uzaytirish niyatida — bu haqda avvalroq ham xabar berilgan edi. Biroq jurnalistning ta’kidlashicha, kelishuv uzaytirilganidan keyin ham Ferranning "Barselona"dagi roli o‘zgarmaydi — hujumchi avvalgidek rotasiya futbolchisi bo‘lib qolaveradi.

Joriy mavsumda Torres barcha turnirlarda 30 ta uchrashuvda ishtirok etib, 16 ta gol urdi va bitta golli uzatmani amalga oshirdi.

Hujumchining "Barselona" bilan amaldagi shartnomasi 2027 yilning yoziga qadar mo‘ljallangan.