«Bavariya» bosh murabbiyi Vensan Kompani jamoa himoyachisi Sasha Boe bilan xayrlashish sabablari haqida o‘z fikrlari bilan o‘rtoqlashdi. Eslatib o‘tamiz, qishki transfer oynasida 25 yoshli fransuz ijara asosida «Galatasaroy»ga yo‘l oldi.

"U sakkiz hafta davomida davolandi. Bundan tashqari, bizda o‘ng qanot himoyasida o‘ynay oladigan Laymer va Stanishich bor, qolaversa, chap qanotdagi bir nechta o‘yinchilar ham safga qaytishdi. Shuning uchun biz Sasha borasida shunday qarorga keldik. Unga barcha ezgu tilaklarni tilab qolaman", — deya Kompanining so‘zlarini keltiradi «Bayern & Germany».

Ma’lumot uchun, «Bavariya» Boeni 2024 yilning yanvarida aynan «Galatasaroy»dan sotib olgan edi. Ushbu mavsumda u barcha turnirlarda 15 ta uchrashuvda ishtirok etib, bitta golli uzatmani amalga oshirdi.