Madridning «Real» klubi rahbariyati Kenan Yildizning «Yuventus» bilan shartnomasini uzaytirish arafasida turganidan hafsalasi pir bo‘ldi. Bu haqda «The Touchline» nashri xabar bermoqda.
Avvalroq 20 yoshli qanot hujumchisi turinliklar bilan 2031 yilgacha mo‘ljallangan yangi shartnoma bo‘yicha kelishuvga erishgani ma’lum bo‘lgan edi.
Manbaning xabariga ko‘ra, «qaymoqranglilar» Yildizni Vinisius Junior jamoani tark etgan taqdirda unga ideal o‘rinbosar sifatida ko‘rishgan. Bu haqda hatto turkiyalik futbolchining atrofidagilarga ham ma’lum qilingan, biroq «Yuventus»ning eng ko‘p maosh oluvchi futbolchisiga aylanish taklifi o‘yinchi uchun juda jozibali tuyulgan.
Joriy mavsumda Yildiz barcha turnirlarni hisobga olganda 31 ta o‘yinda maydonga tushib, to‘qqiz bor raqiblar darvozasini ishg‘ol qildi va o‘z hisobiga sakkizta golli uzatmani yozdirib qo‘ydi.
