Avvalroq Myunxenning «Bavariya» klubi «Manchester Yunayted»ning portugaliyalik o‘ng qanot himoyachisi Diogu Dalotni sotib olishga qiziqish bildirayotgani va ingliz klubi uni yozda qo‘yib yuborishi mumkinligi haqida xabar berilgan edi.

Endilikda nemis grandi futbolchi uchun belgilangan yuqori narx tufayli ushbu transferga shubha bilan qarayotgani qayd etilmoqda. Xabarlarga ko‘ra, myunxenliklar o‘yinchi uchun kechayotgan «poyga»dan chiqishlari mumkin. So‘nggi ma’lumotlarga ko‘ra, portugaliyalikning «Manchester Yunayted» tarkibidagi kelajagi hali ham uzil-kesil belgilanmagan.

Himoyachining «qizil iblislar» bilan amaldagi shartnomasi 2028 yilgacha mo‘ljallangan. «Transfermarkt» 26 yoshli futbolchini 28 million yevroga baholamoqda. Joriy mavsumda Dalot 25 ta o‘yinda maydonga tushib, 1 ta gol urdi va 3 ta golli uzatmani amalga oshirdi.