Madridning «Real» klubi La Liganing yakshanba kungi bahsida «Valensiya» ustidan g‘alaba qozondi (2:0).

«Qaymoqranglilar» ustozi Alvaro Arbeloa Federiko Valverdeni o‘zining asosiy pozisiyasi — yarim himoya markaziga qaytardi, mudofaaning o‘ng qanotiga esa yosh David Ximenesni joylashtirdi.

"Fedening yarim himoyadagi o‘yini? Men uning aynan o‘sha yerda o‘zini eng qulay his qilishini bilaman, biroq u biz uni qaysi pozisiyaga qo‘ymaylik, hamma joyda hayratlanarli darajada yaxshi harakat qiladi", — deya «Madrid Zone» madridliklar bosh murabbiyining javobini keltirmoqda.

Federiko Valverde joriy mavsumda «Real» safida barcha musobaqalarda 32 ta o‘yinda maydonga tushib, o‘z hisobiga bitta gol va to‘qqizta golli uzatmani yozdirib qo‘ydi.