«Barselona» va Madridning «Real» klublari La Liganing 23-turidagi o‘z o‘yinlarida g‘alaba qozonishdi.

Shanba kuni «ko‘k-anorranglilar» «Malyorka»dan ustun kelishdi (3:0), bir kun o‘tib esa «qaymoqranglilar» «Valensiya»ni mag‘lub etishdi (2:0). Kataloniya grandi turnir jadvalida hamon peshqadamlik qilmoqda va madridliklarni atigi bir ochkoga ortda qoldirmoqda, biroq Opta superkompyuterining hisob-kitoblariga ko‘ra, «Barsa»ning chempionlik ehtimoli hozirda ancha yuqori baholanmoqda — 31 foizga qarshi 68 foiz. «Atletiko» esa oltin medallar uchun imkoniyatni deyarli yo‘qotdi — «matraschilar»da bu ko‘rsatkich 1 foizdan ham kam.

Kelgusi turda «Barselona» safarda «Jirona» bilan o‘ynaydi, «Real» esa o‘z maydonida «Real Sosyedad»ni qabul qiladi. Uchrashuvlar mos ravishda 16 va 14 fevral kunlari bo‘lib o‘tadi.