O‘zbekiston shaxmat terma jamoasi bosh murabbiyi, 2004 yilgi FIDE Jahon kubogi g‘olibi Rustam Qosimjonov Tata Steel Chess turnirida bosh sovrinni qo‘lga kiritgan O‘zbekistonning birinchi raqamli grossmeysteri Nodirbek Abdusattorovning nafaqat shaxmat, balki futboldagi qobiliyatini ham alohida ta’kidladi.

“Inson shaxmat bilan shug‘ullansa, tanasi va miyasi charchaydi. Shu sabab uni ‘qayta yoqish’ uchun boshqa sport turi bilan shug‘ullanish kerak. Nodirbek futbolni ham juda yaxshi o‘ynar ekan. Nufuzli shaxmat musobaqasida g‘alaba qozonib qaytdi, endi bu yerda ham gollar uryapti. Bunga qoyil qolish kerak”, deydi Qosimjonov “O‘zbekiston 24” telekanalining “Menimcha” dasturiga bergan intervyusida.

Avvalroq Nodirbek Abdusattorov London shahridagi “Arsenal” klubiga tegishli “Emireyts” stadionida o‘tkazilgan London Chess Classic–2025 turnirida g‘oliblikni qo‘lga kiritganidan so‘ng bergan intervyusida futbolga qiziqishi, har hafta muhim o‘yinlarni tomosha qilishi va Angliyaning “Manchester Siti” klubi muxlisi ekanini aytib o‘tgan edi.

“Ushbu stadionning muhiti o‘zgacha. Avval faqat bir marta futbol stadionida, aniqrog‘i, Eyndhovenda Magnusga qarshi o‘ynaganman. O‘sha bahs ham yaxshi taassurot qoldirgan. Umuman olganda, futbolni juda yaxshi ko‘raman, har hafta uchrashuvlarni tomosha qilib boraman. Sevimli klubim — “Manchester Siti”. Yurtimizdan chiqqan futbolchining bunday katta klubda to‘p tepayotgani meni juda quvontiradi. Shu sabab “Siti”ga muxlislik qilaman”, degan edi Abdusattorov.

Ma’lumot uchun, 2026 yilning 16 yanvaridan 1 fevraliga qadar Niderlandiyaning Veyk-an-Zee shahrida o‘tkazilgan nufuzli Tata Steel Chess xalqaro turnirida Nodirbek Abdusattorov 13 tur yakuniga ko‘ra 9 ochko jamg‘arib, yakka peshqadam sifatida chempionlikni qo‘lga kiritdi.

Turnir davomida u hindistonlik Rameshbabu Praggnanandha, chexiyalik Nguyen Tai Dai Van, amaldagi jahon chempioni Gukesh Dommaraju, germaniyalik Vinsent Keymer va Matias Bluebaum kabi kuchli grossmeysterlarni mag‘lub etib, barqaror va ishonchli o‘yin namoyish etdi.

Musobaqada yana bir o‘zbekistonlik grossmeyster — amaldagi Jahon Kubogi g‘olibi Javohir Sindorov ham muvaffaqiyatli ishtirok etdi. U 13 turda 8,5 ochko to‘plab, ikkinchi o‘rinni egalladi hamda turnir davomida 4 g‘alaba va 9 durang qayd etdi.