«Barselona» sport direktori Deku yarim himoyachi Mark Bernal va jamoaning sobiq a’zosi Serxio Buskets o‘rtasidagi taqqoslashlarga munosabat bildirdi.

«Bernalni Buskets bilan solishtirishga hali juda erta. Men uchun Buskets tarixdagi eng yaxshi tayanch yarim himoyachisi hisoblanadi, biroq Bernalda ham iste’dod bor va u rivojlanishda davom etishi kerak», — deya Dekuning so‘zlarini «Barca Universal» nashri keltirmoqda.

18 yoshli Bernal — «Barselona» akademiyasi tarbiyalanuvchisidir. Joriy mavsumda u barcha musobaqalarni inobatga olgan holda 18 ta o‘yinda ishtirok etib, bitta gol va bitta golli uzatmani o‘z hisobiga yozdirib qo‘ydi.

Bernalning «ko‘k-anorranglilar» bilan shartnomasi 2029 yilga qadar mo‘ljallangan. «Transfermarkt» ekspertlari futbolchining transfer qiymatini 10 million yevroga baholamoqda.