Boykot fonida Krishtianu Ronalduning klubini o‘zgartirishi haqidagi xabarlar paydo bo‘la boshladi. Yaqinda matbuotda «Inter Mayami»ning asosiy investori Devid Bekxem Messi va Ronalduni bir jamoada birlashtirishni istayotgani haqida ma’lumotlar tarqalgan edi.
Endilikda «MessiXtra» sahifasida Ronaldu faoliyatining so‘nggi yillarida Messi bilan birga o‘ynash uchun o‘z agentlaridan «Inter Mayami»ga transferini tashkil qilishni so‘ragani haqida xabar e’lon qilindi. Ushbu post 4 milliondan ortiq ko‘rinish to‘pladi, biroq manbaning o‘zi u qadar ishonchli emas.
Ijtimoiy tarmoqlardagi boshqa shubhali manbalar esa Messi go‘yoki Ronalduning transferiga rozilik bergani haqida yozishmoqda.
Bularning barchasi, albatta, juda qiziq — ko‘plab muxlislar Messi va Ronalduni bir jamoa tarkibida maydonda ko‘rishni orzu qilishadi — ammo nufuzli va rasmiy manbalar hozircha bu haqda hech qanday ma’lumot bermayapti.
