«Arsenal» bosh murabbiyi Mikel Arteta futbolda murabbiylar uchun ham maxsus transfer oynasini joriy etish kerakligi haqidagi savolga javob berdi. Bu taklifga ko‘ra, klublar xuddi futbolchilar kabi, murabbiylar bilan ham faqat belgilangan muddatlarda xayrlashishi yoki yangi mutaxassisni jalb qilishi mumkin bo‘ladi.
«Men bu mavzuga to‘xtalmoqchi emasman — ochig‘i, bilmayman. O‘ylashimcha, klublar qanday yo‘l tutish ma’qulroq ekanligini hal qilishda erkin bo‘lishlari kerak. Bu doim shunday bo‘lib kelgan va ushbu qoidaning o‘zgartirilishi vaziyatni yaxshi tomonga o‘zgartirgan bo‘larmidi, yo‘qmi, buni ayta olmayman», — dedi Arteta matbuot anjumanida.
Hozirda Mikel Arteta «Arsenal» futbolchilarini Angliya chempionati doirasidagi «Brentford»ga qarshi safar o‘yiniga tayyorlamoqda. Ushbu bahs payshanba kuni, 12 fevral kuni bo‘lib o‘tadi.
