Londonning «Arsenal» klubi bosh murabbiyi Mikel Arteta jamoa yarim himoyachisi Martin Subimendining o‘yini haqida o‘z fikrlari bilan o‘rtoqlashdi.
«Bu shunday futbolchimizki, men u bilan ilk bor gaplashganimda, u o‘z pozisiyasida oldinga o‘tish borasida o‘zini biroz cheklangandek his qilayotganini aytgan edi. Biz unga kerakli vaqtda va munosib raqiblarga qarshi o‘yinlarda erkin harakat qilishi uchun imkoniyat beryapmiz. Bu orqali u bo‘sh hududlarga hujum qila oladi va u bu borada shunchaki aql bovar qilmas darajada yaxshi o‘yin ko‘rsatmoqda», — deya Artetaning so‘zlarini «Arsenal» matbuot xizmati keltirmoqda.
Eslatib o‘tamiz, Subimendi APLning yaqinda bo‘lib o‘tgan «Sanderlend»ga qarshi o‘yinida (3:0) raqib darvozasini ishg‘ol qilgan edi. Ispaniyalik futbolchining goli uchrashuvda hisobni ochgan bo‘lib, chap qanot yarim hududidan yo‘llangan nafis va kuchli zarba evaziga kiritildi.
Martin Subimendi 2025 yilning yozida «Arsenal» a’zosiga aylangan edi. Hozirga qadar uning hisobida 6 ta gol mavjud: 5 tasi APLda va bittasi Liga Kubogida kiritilgan.
