Лондоннинг «Арсенал» клуби бош мураббийи Микель Артета жамоа ярим ҳимоячиси Мартин Субимендининг ўйини ҳақида ўз фикрлари билан ўртоқлашди.

«Бу шундай футболчимизки, мен у билан илк бор гаплашганимда, у ўз позициясида олдинга ўтиш борасида ўзини бироз чеклангандек ҳис қилаётганини айтган эди. Биз унга керакли вақтда ва муносиб рақибларга қарши ўйинларда эркин ҳаракат қилиши учун имконият беряпмиз. Бу орқали у бўш ҳудудларга ҳужум қила олади ва у бу борада шунчаки ақл бовар қилмас даражада яхши ўйин кўрсатмоқда», — дея Артетанинг сўзларини «Арсенал» матбуот хизмати келтирмоқда.

Эслатиб ўтамиз, Субименди АПЛнинг яқинда бўлиб ўтган «Сандерленд»га қарши ўйинида (3:0) рақиб дарвозасини ишғол қилган эди. Испаниялик футболчининг голи учрашувда ҳисобни очган бўлиб, чап қанот ярим ҳудудидан йўлланган нафис ва кучли зарба эвазига киритилди.

Мартин Субименди 2025 йилнинг ёзида «Арсенал» аъзосига айланган эди. Ҳозирга қадар унинг ҳисобида 6 та гол мавжуд: 5 таси АПЛда ва биттаси Лига Кубогида киритилган.