«Liverpul» sardori Virdjil van Deyk Angliya chempionatining 26-turi doirasida «Sanderlend» ustidan qozonilgan g‘alaba (1:0) haqida o‘z fikrlarini bildirib o‘tdi.

«Ajoyib g‘alaba, juda qiziqarli va murakkab maydonda og‘ir mehnat qildik. Endi tiklanib olishimiz va dam olish kunlari yana maydonga tushishimiz kerak. Bugun Sanderlendda ko‘rsatgan o‘yinimiz bilan uch ochkoga loyiq edik.

Menimcha, «Sanderlend» bu mavsumda ularni mag‘lub etish qanchalik qiyinligini ko‘rsatib qo‘ydi va bu ularning katta yutug‘i — ular mehnatkash jamoa. G‘alaba qozonish va darvozamiz daxlsizligini saqlab qolish yoqimli bo‘ldi. Biz uchun yaxshi o‘yin. Yigitlarim bilan faxrlanaman, chunki ular astoydil mehnat qilishdi», — deya van Deykning so‘zlarini keltirmoqda BBC.

«Liverpul» 42 ochko jamg‘arib, APL turnir jadvalida 6-o‘rinni egallab turibdi. «Sanderlend» esa 36 ochko bilan 11-pog‘onada qolmoqda.