“Andijon” klubi Turkiyaning Antaliya shahrida qizg‘in ravishda o‘quv-mashg‘ulot yig‘inlarini olib bormoqda. Tabiiyki, har bir futbolchi maksimal kuch bilan ishga yondashuv asosida o‘z ustida ishlamoqda. Shu jumladan, Doniyor Abdumannopov ham murabbiyning ko‘rsatmasini bajarish uchun jiddiy mehnat qilyapti va o‘z mahoratini namoyish etish ustida ishlamoqda.

Klub matbuot xizmati Doniyor bilan yig‘in haqida suhbatlashdi.

— Doniyor, jamoamizning Antaliya yig‘ini yuqori kayfiyatda davom etayotganiga guvoh bo‘lyapmiz. Unda bevosita ishtirok etayotgan futbolchi sifatida o‘tkazilayotgan yig‘in haqida nimalarni ayta olasiz?

— Assalomu alaykum. Yig‘in yaxshi o‘tyapti. Ko‘proq qishki tayyorgarlik jarayonida jismoniy holatga e’tibor qaratiladi. Jamoamizga yangi futbolchilar kelgan, ular bilan bir-birimizni tushunish uchun ko‘proq o‘yin o‘ynayapmiz. O‘yindan-o‘yinga yaxshilanib boryapti. Bir-birimizni yaxshi tushunib boryapmiz. Xudo xohlasa, chempionatga yaxshi formada boramiz.

— Shuningdek, u yerda o‘rtoqlik uchrashuvlari ham tashkil qilinyapti. Xorij jamoalariga qarshi bellashuvlardan nima olyapsiz?

— O‘yinlarda o‘zimni ham tahlil qilyapman. Ko‘proq xatolar ustida ishlayapman.

— Yangi mavsumda “Andijon” umuman boshqacha qiyofada namoyon bo‘lmoqda va maqsad ham shunga yarasha jiddiy. Shaxsan yangi mavsumdan nima kutyapsiz va imkoniyatlarimizni qanday baholaysiz?

— Maqsad doim yuqori qo‘yiladi. Amalda ko‘rsatish kerak. Mening fikrim, sababini qilishimiz va Allohdan so‘rashimiz kerak, qolgani Xudodan.

— Ilk turni "Bobur arena"da "So‘g‘diyona"ga qarshi o‘yin bilan boshlaymiz. Ilk turdagi muhitni qanday tasavvur qilyapsiz?

— Muhit “Ultras Burgut” bilan doim zo‘r bo‘ladi.

— Siz "Andijon" safida 33-raqamni tanladingiz. Bu nima bilan bog‘liq edi?

— 33-raqamda futbol o‘ynashni “Andijon”da boshlaganman. Men uchun qadrli bo‘lib qolgan.