«Tottenxem» jamoaning yangi bosh murabbiyi sifatida Igor Tudor bilan hamkorlik qilishga tayyor, biroq bu kelishuv faqat joriy mavsum yakuniga qadar davom etishi mumkin. Bu haqda insayder Fabrisio Romano xabar bermoqda.
Manbaning tasdiqlashicha, «shporlar» va murabbiy tomoni allaqachon aloqa o‘rnatishgan. London klubi rahbariyati Tudorni vaqtinchalik variant sifatida ko‘rmoqda, yozda esa jamoani doimiy asosda boshqarish uchun asosiy nomzodlar sifatida Roberto De Dzerbi va Maurisio Pochettino variantlari ko‘rib chiqilmoqda.
«Tottenxem» shu hafta boshida, aniqrog‘i 11 fevral kuni Daniyalik mutaxassis Tomas Frankni iste’foga chiqardi. U 2025 yilning yozidan beri jamoani boshqarib kelayotgan edi. Ayni damda londonliklar Angliya Premyer-ligasi turnir jadvalida 16-o‘rinni egallab turishibdi.
Eslatib o‘tamiz, Igor Tudor joriy mavsum boshida «Yuventus»da ishlagan, biroq oktyabr oyida 8 ta o‘yindan iborat g‘alabasiz seriyadan so‘ng Turin klubidan haydalgan edi.
