«Real» bosh murabbiyi Alvaro Arbeloa Superliga atrofidagi vaziyatga o‘z munosabatini bildirdi. Bir kun avval, ya’ni 11 fevral kuni Madrid klubi UYEFA va Yevropa klublari assosiasiyasi (EFC) bilan kelishuvga erishganini e’lon qilgach, loyiha rasman o‘z faoliyatini to‘xtatdi.

"Klub bu mavzuda rasmiy bayonot berib bo‘ldi — men ushbu pozisiyani qo‘llab-quvvatlayman. Bu futbol uchun foydali kelishuv", — dedi Arbeloa matbuot anjumanida.

Eslatib o‘tamiz, 2021 yilning bahorida 12 ta grand klub Superliga ishga tushirilishini e’lon qilgan edi. Biroq muxlislarning keskin noroziligidan so‘ng ularning 9 tasi loyihani tezda tark etdi. Keyinchalik «Yuventus» ham undan chiqdi. Joriy yilning 7 fevral kuni «Barselona» loyihadan chiqqanini e’lon qilgach, «Real» so‘nggi ishtirokchi sifatida qolgan edi. 11 fevral kuni Madrid klubi ham UYEFA bilan «tinchlik shartnomasi»ni imzolab, Superliga bobini butunlay yopdi.