«Реал» бош мураббийи Альваро Арбелоа Суперлига атрофидаги вазиятга ўз муносабатини билдирди. Бир кун аввал, яъни 11 февраль куни Мадрид клуби УЕФА ва Европа клублари ассоциацияси (EFC) билан келишувга эришганини эълон қилгач, лойиҳа расман ўз фаолиятини тўхтатди.
"Клуб бу мавзуда расмий баёнот бериб бўлди — мен ушбу позицияни қўллаб-қувватлайман. Бу футбол учун фойдали келишув", — деди Арбелоа матбуот анжуманида.
Эслатиб ўтамиз, 2021 йилнинг баҳорида 12 та гранд клуб Суперлига ишга туширилишини эълон қилган эди. Бироқ мухлисларнинг кескин норозилигидан сўнг уларнинг 9 таси лойиҳани тезда тарк этди. Кейинчалик «Ювентус» ҳам ундан чиқди. Жорий йилнинг 7 февраль куни «Барселона» лойиҳадан чиққанини эълон қилгач, «Реал» сўнгги иштирокчи сифатида қолган эди. 11 февраль куни Мадрид клуби ҳам УЕФА билан «тинчлик шартномаси»ни имзолаб, Суперлига бобини бутунлай ёпди.
