Londonning "Arsenal" jamoasi bosh murabbiyi Mikel Arteta yarim himoyachi Itan Nvanerini ijaraga berganidan afsusdami yoki yo‘qligi haqidagi savolga javob berdi.
"Merino besh oyga safdan chiqishini, Xavers esa yo‘qligini kim ham bashorat qila olardi? Bu achinarli. Ammo Itan uchun boshqa muhitda o‘zini sinab ko‘rish, o‘yin amaliyotiga ega bo‘lish va bizga qaytishga tayyorgarlik ko‘rish juda muhim", — deya Artetaning so‘zlaridan iqtibos keltirmoqda jurnalist Fabrisio Romano.
18 yoshli hujumkor yarim himoyachi qishki transfer oynasida "Arsenal"dan "Marsel"ga o‘tgan edi. Fransiya klubi tarkibida Nvaneri to‘rtta o‘yin o‘tkazib, bitta gol urishga ulgurdi.
"Arsenal" 26 turdan keyin 57 ochko jamg‘argan holda Angliya chempionatida peshqadamlik qilmoqda. Navbatdagi turda "kanonirlar" "Vulverxempton" bilan to‘qnash kelishadi (18 fevral).
