"Liverpul" bosh murabbiyi Arne Slot Muhammad Salohning samaradorligi pasayishi mavzusida mulohaza yuritdi. O‘tgan mavsumda misrlik futbolchi 29 ta gol va 18 ta golli uzatma bilan bir vaqtning o‘zida Premyer-liganing eng yaxshi to‘purari va eng yaxshi assistentiga aylangan edi.

Joriy mavsumda bunday ko‘rsatkichlarga yaqinlashishning imkoni bo‘lmasa kerak: hozirda 33 yoshli futbolchi hisobida 18 ta o‘yinda to‘rtta gol va oltita assist mavjud.

"Pasayishning bir qancha sabablari bo‘lishi mumkin. Ehtimol, shunday ajoyib mavsumdan so‘ng raqiblar Muhammad Saloh qanchalik xavfli ekanini yanada yaxshiroq anglab yetishgandir, shuningdek, o‘ng qanotda uning yonida kim o‘ynayotgani ham ta’sir qiladi. Men yana besh yoki oltita sababni sanab o‘tishim mumkin edi, lekin umuman olganda, biz avvalgidek ko‘p vaziyatlar yaratayotganimizni va ligada to‘p nazorati bo‘yicha eng yuqori ko‘rsatkichga ega ekanimizni ko‘ryapman. Ko‘ramiz, Muhammad mavsumning yakuniy oylarida natija ko‘rsatish borasida o‘zini qanday namoyon etar ekin", — deya ingliz OAVlari Slotning so‘zlarini keltirmoqda.

Bugun "Liverpul" Angliya Kubogi doirasida "Brayton"ga qarshi maydonga tushadi.