Madridning "Real" klubi darvozaboni Tibo Kurtua La Liga doirasidagi "Real Sosyedad"ga qarshi bo‘lajak o‘yin haqida o‘z fikrlarini bildirdi.

"Qaymoqranglilar" uchun o‘z maydonida kechadigan ushbu uchrashuv shanba kuni bo‘lib o‘tadi va Toshkent vaqti bilan soat 01:00 da (yakshanbaga o‘tar kechasi) boshlanishi rejalashtirilgan.

«Real Sosyedad» bir oz ko‘proq charchagan bo‘ladi, chunki ular yaqinda Ispaniya Kubogi yarim finalida o‘ynashdi. Shuni hisobga olgan holda, biz uchun o‘yinni shijoatli va ishonch bilan boshlash juda muhim. Maqsadimiz — g‘alabalarni davom ettirish va turnir jadvalining eng yuqori pog‘onasiga ko‘tarilish», — deya Kurtuaning so‘zlarini keltiradi "Madrid Zone".

Chorshanba kuni "Real Sosyedad" Ispaniya Kubogi 1/2 finalining safardagi bahsida "Atletik" Bilbaoni mag‘lub etdi (1:0). Eslatib o‘tamiz, Madridning "Real" klubi musobaqaning 1/8 finalidayoq mag‘lub bo‘lib, turnirni tark etgan edi.