Italiya chempionati — Seriya A 2025/2026 yilgi mavsumining 25-turida "Inter" va "Yuventus" o‘rtasidagi bahs yakunlandi. Uchrashuv Milandagi «Juzeppe Meassa» stadionida bo‘lib o‘tdi. Bosh hakam sifatida Federiko La Penna ish olib bordi.

Qizg‘in kechgan bellashuv 3:2 hisobida maydon egalari foydasiga hal bo‘ldi.

17-daqiqada turinliklar himoyachisi Andrea Kambyazo to‘pni o‘z darvozasiga kiritib qo‘ydi. Ammo 26-daqiqada u xatosini to‘g‘irlab, hisobni tenglashtirdi. 42-daqiqada «Yuventus» futbolchisi Pyer Kalyulyu maydondan nohaq chetlatildi: mezbonlar futbolchisi simulyasiya ishlatdi va hakam Pyerga ikkinchi sariq kartochka ko‘rsatib, maydondan chetlatdi.

76-daqiqada Franchesko Espozito milanliklarni yana oldinga olib chiqdi. Mehmonlar 83-daqiqada Manuel Lokatellining goli orqali yana muvozanatni tiklashdi. Uchrashuv taqdiri 90-daqiqada hal bo‘ldi — Pyotr Zelinski aniq zarba yo‘llab, «neradzurri»ga g‘alabani taqdim etdi.

25-turdan keyin «Inter» 61 ochko bilan turnir jadvalida peshqadamlik qilmoqda. «Yuventus» 46 ochko bilan beshinchi pog‘onada joylashgan.

Keyingi turda Italiya chempionati yetakchilari safarda «Lechche» mehmoni bo‘ladi. «Yuventus» esa o‘z maydonida «Komo»ni qabul qiladi. Har ikki uchrashuv 21 fevral kuni bo‘lib o‘tadi.

Italiya — Seriya A, 25-tur
14 fevral 2026 yil. Milan. «Juzeppe Meassa»
Inter — Yuventus — 3:2
Gollar: 1:0 — Kambyazo (17, avtogol), 1:1 — Kambyazo (26), 2:1 — Espozito (76), 2:2 — Lokatelli (83), 3:2 — Zelinski (90)
Chetlatish: Kalyulyu (42, «Yuventus»)