Trent Aleksandr-Arnold dekabr oyidan beri ilk bor Madridning "Real" klubi asosiy tarkibida maydonga tushdi. Qaytish muvaffaqiyatli kechdi: ingliz futbolchisi "Real Sosyedad" bilan uchrashuvning 5-daqiqasidayoq Gonsalo Garsiyaga golli uzatma yetkazib berdi, 60-daqiqada esa "qaymoqranglilar" 4:1 hisobida oldinda borayotgan vaqtda zaxiraga olindi. Qolgan vaqt ichida darvozalarga gol urilmadi.

Jamoa ustozi Alvaro Arbeloa Trentning yorqin o‘yini uni hayron qoldirmaganini tan oldi.

"Men hayratda emasman. U juda aqlli, o‘yinni mukammal tushunadi. Uning mahorati va IQ (intellekt) darajasi yuqori nuqtada.

Bizda shunday futbolchi borligidan baxtiyormiz, lekin bu yangilik emas. Vaqt o‘tishi bilan u o‘zining eng yuqori formasiga qaytadi", — dedi Arbeloa o‘yindan keyingi OAV bilan suhbatda.

Eslatib o‘tamiz, Trent Aleksander-Arnold jarohati sababli ikki oydan ortiq vaqtni o‘tkazib yuborgan edi.