Трент Александр-Арнольд декабрь ойидан бери илк бор Мадриднинг "Реал" клуби асосий таркибида майдонга тушди. Қайтиш муваффақиятли кечди: инглиз футболчиси "Реал Сосьедад" билан учрашувнинг 5-дақиқасидаёқ Гонсало Гарсияга голли узатма етказиб берди, 60-дақиқада эса "қаймоқранглилар" 4:1 ҳисобида олдинда бораётган вақтда захирага олинди. Қолган вақт ичида дарвозаларга гол урилмади.
Жамоа устози Альваро Арбелоа Трентнинг ёрқин ўйини уни ҳайрон қолдирмаганини тан олди.
"Мен ҳайратда эмасман. У жуда ақлли, ўйинни мукаммал тушунади. Унинг маҳорати ва IQ (интеллект) даражаси юқори нуқтада.
Бизда шундай футболчи борлигидан бахтиёрмиз, лекин бу янгилик эмас. Вақт ўтиши билан у ўзининг энг юқори формасига қайтади", — деди Арбелоа ўйиндан кейинги ОАВ билан суҳбатда.
Эслатиб ўтамиз, Трент Александер-Арнольд жароҳати сабабли икки ойдан ортиқ вақтни ўтказиб юборган эди.
