Madridning "Real" klubi bosh murabbiyi Alvaro Arbeloa o‘z jamoasining o‘yin uslubi haqidagi fikrlari bilan o‘rtoqlashdi.

Shanba kuni "qaymoqranglilar" o‘z maydonlarida "Real Sosyedad"ni mag‘lub etishdi (4:1) va kamida dushanbaga qadar La Liga turnir jadvalida birinchi o‘ringa qaytishdi.

"Bizning jamoa turli uslublarda o‘ynashga qodir. Biz to‘p nazoratiga urg‘u berishimiz mumkin, shu bilan birga, tarkibimizda ajoyib tezlikka ega futbolchilar bor, bu esa bizga qarshi hujumlarda ham samarali harakat qilish imkonini beradi", — dedi Arbeloa o‘yindan keyingi intervyusida.

43 yoshli mutaxassis yanvar oyida Xabi Alonsoning o‘rnini egallab, o‘z lavozimiga kirishgan edi.

Seshanba, 17 fevral kuni "Real" Chempionlar ligasi doirasida safarda "Benfika"ga qarshi bahs olib boradi.