Мадриднинг "Реал" клуби бош мураббийи Альваро Арбелоа ўз жамоасининг ўйин услуби ҳақидаги фикрлари билан ўртоқлашди.

Шанба куни "қаймоқранглилар" ўз майдонларида "Реал Сосьедад"ни мағлуб этишди (4:1) ва камида душанбага қадар Ла Лига турнир жадвалида биринчи ўринга қайтишди.

"Бизнинг жамоа турли услубларда ўйнашга қодир. Биз тўп назоратига урғу беришимиз мумкин, шу билан бирга, таркибимизда ажойиб тезликка эга футболчилар бор, бу эса бизга қарши ҳужумларда ҳам самарали ҳаракат қилиш имконини беради", — деди Арбелоа ўйиндан кейинги интервьюсида.

43 ёшли мутахассис январь ойида Хаби Алонсонинг ўрнини эгаллаб, ўз лавозимига киришган эди.

Сешанба, 17 февраль куни "Реал" Чемпионлар лигаси доирасида сафарда "Бенфика"га қарши баҳс олиб боради.