Ispaniya Kubogida «Atletiko»dan qabul qilingan 0:4 hisobidagi mag‘lubiyatdan so‘ng, «Barselona» hakamlikdan norozi bo‘ldi. Yakshanba kungi matbuot anjumanida «ko‘k-anorranglilar» ustozi Xans-Diter Flik ushbu mavzudagi savollarga javob berdi.

— Payshanba kungi hakamlik haqida nima deb o‘ylaysiz?

— Ba’zida bizga yoqmaydigan voqealar sodir bo‘ladi. Madridda kiyinish xonasida hakam bilan gaplashib oldim, chunki undan nima sababdan golni inobatga olmaganini tushuntirib berishini xohladim. O‘yindan keyingi muloqot ijobiy bo‘ldi. Biz hakam tufayli yutqazmadik. O‘yinimizni yaxshilashimiz kerak.

— Suhbat qanday o‘tdi?

— Hakamlar xonasi eshigini taqillatdim va biz gaplashib oldik. Bu normal holat — maydonda kuchli bosim bo‘ladi. Oramizda yaxshi suhbat bo‘lib o‘tdi va u faqat ikkimizga tegishli bo‘lib qoladi.

— Hakamlar bilan munosabatlarni normallashtirish mumkinmi?

— Iloji bor. Lekin odatda men ko‘proq jamoaga e’tibor qarataman. Matbuot anjumanidan so‘ng shunchaki hakamlar bilan gaplashishim kerakligini his qildim. Bordim va ular menga eshikni ochishdi.