«Barselona» bosh murabbiyi Xans-Diter Flik La Liga doirasidagi «Jirona»ga qarshi o‘yin oldidan jamoadagi kadrlar holati haqidagi savolga javob berdi. Nemis mutaxassisining so‘zlariga ko‘ra, vinger Rafinya jamoaga yordam berishga tayyor, biroq Markus Reshford hozircha maydonga tushishga tayyor emas.
«Reshfordning ahvoli yaxshilanayotgan bo‘lsa-da, u o‘ynamaydi. Rafinya esa maydonga tushishi mumkin», — dedi Flik yakshanba kungi matbuot anjumanida.
Rafinya mushaklaridagi muammo sababli oxirgi bir nechta o‘yinni o‘tkazib yuborgan edi. Reshfordga kelsak, u hafta o‘rtasida kataloniyaliklar 0:4 hisobida mag‘lub bo‘lgan «Atletiko»ga qarshi kubok bahsida ishtirok etmadi.
La Liga doirasidagi «Jirona» va «Barselona» o‘rtasidagi uchrashuv 16 fevral kuni Toshkent vaqti bilan soat 01:00 da (17 fevralga o‘tar kechasi) boshlanadi.
