Angliya Kubogining to‘rtinchi bosqichi doirasida «Arsenal» o‘z maydonida «Uigan»ni tor-mor keltirdi. Uchrashuv 4:0 hisobida yakunlandi. «Kanonirlar» barcha gollarni birinchi bo‘limda kiritishdi.
OptaJoe ma’lumotlariga ko‘ra, «Arsenal» 1992/93 yilgi mavsumdan beri Angliya Kubogi o‘yinining dastlabki yarim soatida raqib darvozasiga to‘rtta gol urishga muvaffaq bo‘lgan ilk Premyer-liga vakiliga aylandi. Gollarga Madueke, Martinelli va Jezus mualliflik qilgan bo‘lsa, yana bir gol Xant tomonidan o‘z darvozasiga (avtogol) kiritildi.
«Arsenal» navbatdagi o‘yinini 18 fevral kuni o‘tkazadi. Shu kuni Mikel Arteta shogirdlari Angliya chempionatining qoldirilgan 31-turi doirasida «Vulverxempton» bilan to‘qnash kelishadi. Uchrashuv Toshkent vaqti bilan tungi soat 01:00 da boshlanadi.













