«Manchester Yunayted» markaziy himoyachisi Matteys de Ligt uch oylik jarohatdan so‘ng safga qaytishga tayyorgarlik ko‘rmoqda. Noyabr oyida belidan jarohat olib, jami 15 ta o‘yinni o‘tkazib yuborgan 26 yoshli futbolchi kelgusi oyda maydonga qaytishni maqsad qilgan.
Yaqinda tiklanish jarayonida kichik ko‘ngilsizlikka duch kelgan bo‘lsa-da, niderlandiyalik himoyachi jarrohlik amaliyotidan qutulib qoldi va ayni damda Kerringtonda reabilitasiyani davom ettirmoqda. Manbalarga ko‘ra, futbolchi uzoq muddatli tanaffus uning Jahon chempionatidagi ishtirokiga ta’sir qilishi mumkinligidan xavotir olmasdan, vaziyatga xotirjam yondashmoqda.
Hozirda Maykl Kerrik boshchiligida beshta o‘yindan beri mag‘lubiyat nimaligini bilmay kelayotgan va turnir jadvalida to‘rtinchi o‘rinni egallab turgan «Yunayted» safida Garri Maguayr va Lisandro Martines ishonchli juftlik hosil qilgan. Shunday bo‘lsa-da, de Ligt mavsumning hal qiluvchi pallasida jamoaga yordam berishni istamoqda. Shuningdek, «qizil iblislar»ning yana bir a’zosi Meyson Maunt ham kichik jarohatidan so‘ng safga qaytishga yaqin turibdi.
