«Манчестер Юнайтед» марказий ҳимоячиси Маттейс де Лигт уч ойлик жароҳатдан сўнг сафга қайтишга тайёргарлик кўрмоқда. Ноябрь ойида белидан жароҳат олиб, жами 15 та ўйинни ўтказиб юборган 26 ёшли футболчи келгуси ойда майдонга қайтишни мақсад қилган.
Яқинда тикланиш жараёнида кичик кўнгилсизликка дуч келган бўлса-да, нидерландиялик ҳимоячи жарроҳлик амалиётидан қутулиб қолди ва айни дамда Кэррингтонда реабилитацияни давом эттирмоқда. Манбаларга кўра, футболчи узоқ муддатли танаффус унинг Жаҳон чемпионатидаги иштирокига таъсир қилиши мумкинлигидан хавотир олмасдан, вазиятга хотиржам ёндашмоқда.
Ҳозирда Майкл Кэррик бошчилигида бешта ўйиндан бери мағлубият нималигини билмай келаётган ва турнир жадвалида тўртинчи ўринни эгаллаб турган «Юнайтед» сафида Гарри Магуайр ва Лисандро Мартинес ишончли жуфтлик ҳосил қилган. Шундай бўлса-да, де Лигт мавсумнинг ҳал қилувчи палласида жамоага ёрдам беришни истамоқда. Шунингдек, «қизил иблислар»нинг яна бир аъзоси Мэйсон Маунт ҳам кичик жароҳатидан сўнг сафга қайтишга яқин турибди.
