«Atletik»ning yulduz vingeri Niko Uilyams o‘tgan dam olish kunlarida «Real Ovyedo»ga qarshi o‘yinni o‘tkazib yubordi. Bilbao klubi rasmiy saytining xabar berishicha, Uilyams jamoaning yaqin oradagi uchrashuvlarida ham ishtirok etmaydi.
«Atletik» bayonotida qayd etilishicha, Uilyams pubalgiya (qovuq sohasidagi surunkali og‘riq) tufayli mustaqil mutaxassis nazoratida davolanishni boshlagan. Niko maxsus dastur asosida muolaja oladi, uning tiklanishi esa sog‘ayish dinamikasiga bog‘liq bo‘ladi — aniq muddatlar hozircha ma’lum emas.
Avvalroq matbuotda Niko Uilyams noqulaylik (og‘riq) bilan o‘ynayotgani haqida yozilgan edi. Joriy mavsumda futbolchi 26 ta rasmiy o‘yinda maydonga tushib, 4 ta gol urdi va sheriklariga 6 ta golli uzatmani amalga oshirdi.













