Madridning "Real" klubi himoya chizig‘ini kuchaytirish uchun yangi nomzodlarni qidirishda davom etmoqda. "Qaymoqranglilar" "Liverpul" himoyachisi Ibraima Konatega bo‘lgan qiziqishini yana tikladi.

Fransiyalik futbolchi o‘zining eng yaxshi sport formasiga qaytdi. Biroq, u haligacha "Liverpul" bilan shartnomasini uzaytirgani yo‘q. Tomonlar o‘rtasidagi amaldagi kelishuv shu yozda nihoyasiga yetadi. "Real" aynan mana shu vaziyatdan unumli foydalanib qolmoqchi. "Qirollik klubi" rahbariyati yuqori saviyali markaziy himoyachini tekinga (erkin agent sifatida) qo‘lga kiritishni ko‘zlamoqda.

Eslatib o‘tamiz, kelayotgan yozda "Real" o‘z tarkibidagi bir nechta himoyachilar bilan xayrlashadi. Ularning o‘rniga yangi ijrochilar taklif etilishi rejalashtirilgan.