«Manchester Siti» hujumchisi Rayan Sherki o‘zining sobiq jamoasi — «Lion»ning hozirgi o‘yin darajasi haqida o‘z fikrlari bilan o‘rtoqlashdi. Futbolchi Liga 1ning 22-turi doirasidagi bahsni bevosita stadiondan kuzatdi. Unda lionliklar «Nissa» ustidan 2:0 hisobida g‘alaba qozonishdi.
«Bu yerga qaytganimdan xursandman. Ketma-ket 13-g‘alabaga erishish — bu shunchaki aql bovar qilmaydigan natija. «Lion» hozir turgan mavqeidan faxrlanaman. Jamoaga eng yaxshi tilaklarimni tilab qolaman», — deya Sherkining so‘zlarini keltiradi ijtimoiy tarmoqdagi Ligue 1 Plus akkaunti.
Rayan Sherki «Lion» akademiyasi tarbiyalanuvchisi hisoblanadi va 2010 yildan 2025 yilgacha klub tizimida faoliyat yuritgan. U asosiy jamoa safida 185 ta o‘yin o‘tkazib, 29 ta gol urgan va 45 ta golli uzatmani amalga oshirgan.
Hozirda «Lion» 45 ochko bilan Fransiya chempionati turnir jadvalida uchinchi o‘rinni egallab turibdi.
