«Манчестер Сити» ҳужумчиси Райан Шерки ўзининг собиқ жамоаси — «Лион»нинг ҳозирги ўйин даражаси ҳақида ўз фикрлари билан ўртоқлашди. Футболчи Лига 1нинг 22-тури доирасидаги баҳсни бевосита стадиондан кузатди. Унда лионликлар «Ницца» устидан 2:0 ҳисобида ғалаба қозонишди.

«Бу ерга қайтганимдан хурсандман. Кетма-кет 13-ғалабага эришиш — бу шунчаки ақл бовар қилмайдиган натижа. «Лион» ҳозир турган мавқеидан фахрланаман. Жамоага энг яхши тилакларимни тилаб қоламан», — дея Шеркининг сўзларини келтиради ижтимоий тармоқдаги Ligue 1 Plus аккаунти.

Райан Шерки «Лион» академияси тарбияланувчиси ҳисобланади ва 2010 йилдан 2025 йилгача клуб тизимида фаолият юритган. У асосий жамоа сафида 185 та ўйин ўтказиб, 29 та гол урган ва 45 та голли узатмани амалга оширган.

Ҳозирда «Лион» 45 очко билан Франция чемпионати турнир жадвалида учинчи ўринни эгаллаб турибди.