«Yuventus» himoyachisi Bremer Chempionlar ligasi doirasidagi «Galatasaroy»ga qarshi o‘yinda jarohat oldi.

Uchrashuvning 27-daqiqasida braziliyalik futbolchi o‘ng oyog‘i sonining orqa qismini ushlagancha maydonga o‘tirib qoldi. Shundan so‘ng himoyachini maydon tashqarisiga olib chiqishdi. Bremer o‘yinni davom ettirishga harakat qilib ko‘rdi, biroq bir necha daqiqadan so‘ng baribir zaxiraga olindi. 34-daqiqada uning o‘rniga Federiko Gatti maydonga tushdi.

Eslatib o‘tamiz, Bremer o‘tgan mavsumning katta qismini tizzasidagi xochsimon bog‘lamlar jarohati tufayli o‘tkazib yuborgan edi. Joriy mavsumda esa unda tizza medial meniskining yorilishi kuzatilgandi.