Londonning «Arsenal» klubi yarim himoyachisi Deklan Rays o‘z jamoadoshi, 16 yoshli Maks Douman haqidagi fikrlari bilan o‘rtoqlashdi.

Yosh angliyalik futbolchi dekabr oyi oxiridagina 16 yoshni qarshi olganiga qaramay, «kanonirlar»ning asosiy jamoasi safida allaqachon beshta uchrashuvda maydonga tushishga ulgurdi.

«Douman — aql bovar qilmas futbolchi. Men hali uning yoshida bunday iqtidorga ega bo‘lgan o‘yinchini ko‘rmaganman. U haqida birinchi bo‘lib Jek Uilsher: «Sen uni kuzatishing kerak», deb aytgan edi. Agar futbolchi haqiqatan ham mahoratli bo‘lsa, buni darhol payqaysiz va Maks bilan bog‘liq vaziyatda ham aynan shunday bo‘ldi», — deya Raysning so‘zlaridan iqtibos keltirmoqda jurnalist Saymon Kollings.

Eslatib o‘tamiz, yakshanba kuni «Arsenal» Premyer-liga doirasida safarda «Tottenxem» jamoasiga qarshi bahs olib boradi.