Angliya terma jamoasi sobiq hujumchisi Garri Lineker Angliya Premyer-ligasidagi chempionlik poygasi haqida o‘z fikrlarini bildirdi.

Ayni damda chempionat peshqadami bo‘lib turgan "Arsenal" so‘nggi ikki o‘yinda "Brentford" (1:1) va "Vulverxempton" (2:2) bilan durang o‘ynab, muhim ochkolarni boy berdi. "Manchester Siti" bilan oradagi farq besh ochkoni tashkil etmoqda, biroq "shaharliklar" ixtiyorida yana bitta zaxira o‘yini mavjud.

"Shaxsan men hali ham ular ("Arsenal") yakunda chempionlikni qo‘lga kiritadi deb o‘ylayman. Ehtimol, hozirgi holat hammasini to‘g‘rilab olish uchun ularga kerak bo‘lgan o‘ziga xos «silkinish» bo‘lib xizmat qilar", — deya Linekerning so‘zlarini keltiradi "Goal" nashri.

APLning 27-turida "to‘pchilar" safarda "Tottenxem"ga qarshi bahs olib boradilar, "Manchester Siti" esa "Nyukasl" bilan to‘qnash keladi.