«Liverpul»ning sobiq bosh murabbiyi Yurgen Klopp yarim himoyachi Jeyms Milner o‘rnatgan rekord haqida gapirdi. 40 yoshli Milner APLda o‘tkazilgan o‘yinlar soni bo‘yicha (654 ta o‘yin) liga peshqadamiga aylandi.

«Jeyms Milnerni nima o‘zgacha qiladi? Rostini aytsam, gapni nimadan boshlashni ham bilmayman. «Liverpul»da erishgan barcha muvaffaqiyatlarimiz u siz amalga oshmagan bo‘lardi. Bunchalik ko‘p o‘yinda maydonga tushish — xuddi Oyga qo‘nishdek gap. Ehtimol, bunday voqea faqat bir marta sodir bo‘lar?», — dedi Klopp ESPN telekanaliga bergan intervyusida.

Faoliyati davomida Milner uch karra Angliya chempioni bo‘ldi, 2 martadan Angliya Kubogi va Liga Kubogida zafar quchdi, bir martadan Chempionlar Ligasi va Intertoto Kubogida g‘olib chiqdi. U Angliya asosiy terma jamoasi safida 61 ta o‘yin o‘tkazib, 1 ta gol urgan, yoshlar terma jamoasi bilan esa Yevropa chempionati finaligacha yetib borgan.