«Ливерпуль»нинг собиқ бош мураббийи Юрген Клопп ярим ҳимоячи Жеймс Милнер ўрнатган рекорд ҳақида гапирди. 40 ёшли Милнер АПЛда ўтказилган ўйинлар сони бўйича (654 та ўйин) лига пешқадамига айланди.

«Жеймс Милнерни нима ўзгача қилади? Ростини айтсам, гапни нимадан бошлашни ҳам билмайман. «Ливерпуль»да эришган барча муваффақиятларимиз у сиз амалга ошмаган бўларди. Бунчалик кўп ўйинда майдонга тушиш — худди Ойга қўнишдек гап. Эҳтимол, бундай воқеа фақат бир марта содир бўлар?», — деди Клопп ESPN телеканалига берган интервьюсида.

Фаолияти давомида Милнер уч карра Англия чемпиони бўлди, 2 мартадан Англия Кубоги ва Лига Кубогида зафар қучди, бир мартадан Чемпионлар Лигаси ва Интертото Кубогида ғолиб чиқди. У Англия асосий терма жамоаси сафида 61 та ўйин ўтказиб, 1 та гол урган, ёшлар терма жамоаси билан эса Европа чемпионати финалигача етиб борган.