«Manchester Siti» yozda «Nyukasl Yunayted»ning o‘ng qanot himoyachisi Tino Livramentoni sotib olishni rejalashtirmoqda. Bu haqda talkSPORT insayderlari xabar bermoqda.
«Shaharliklar» anchadan beri futbolchining harakatlarini kuzatib borishmoqda. Ingliz grandi Livramentoni mudofaaning o‘ng qanoti uchun uzoq muddatli yechim sifatida ko‘rmoqda. Ma’lumot uchun, ushbu mavsumda mazkur pozisiyada universal yarim himoyachi Mateus Nunes to‘p tepmoqda.
«Nyukasl» esa hali ham himoyachi bilan yangi shartnoma imzolashdan umid uzgani yo‘q. Joriy mavsumda Tino Livramento 19 ta uchrashuvda maydonga tushdi va o‘z hisobiga bitta golli uzatmani yozdirib qo‘ydi.
