"Benfika" hujumkor yarim himoyachisi Djanluka Prestianni Chempionlar ligasining o‘tish bosqichi doirasida "Real"ga qarshi bo‘lib o‘tadigan javob o‘yinida maydonga tusha olmaydi. UEFA Prestiannini vaqtinchalik — bitta o‘yinga chetlatish haqida qaror qabul qilganini e’lon qildi.

Prestiannining vaqtinchalik diskvalifikasiya qilinishi UEFAning Lissabondagi birinchi o‘yin yuzasidan olib borayotgan surishtiruvining oraliq hisobotidan o‘rin olgan. Ma’lumki, o‘shanda Vinisius Prestiannini irqchilikda ayblagan edi. "Benfika" futbolchisining o‘zi esa braziliyalik uni noto‘g‘ri tushunganini ta’kidlagan.

UEFA Prestianni tomonidan kamsituvchi xulq-atvor belgilari dastlabki tarzda aniqlanganini alohida qayd etdi. Shuningdek, ushbu vaqtinchalik cheklov surishtiruv yakuni bo‘yicha chiqariladigan yakuniy qarorga ta’sir qilmasligi aytilgan. Bu esa Prestianni yakunda albatta diskvalifikasiya qilinishini anglatadi — faqat uning nechta o‘yinga chetlatilishi hozircha noma’lum.