Angliyaning «Nyukasl» klubi bosh murabbiyi Eddi Xau Ozarbayjonning «Qorabog‘» jamoasiga qarshi bo‘lib o‘tadigan Chempionlar ligasi uchrashuvi oldidan matbuot anjumanida ishtirok etdi. Javob o‘tish o‘yini bugun, 24 fevral kuni bo‘lib o‘tadi.
«Biz yuqori darajada raqobatlasha olishimizni allaqachon isbotladik. Avvalo, g‘alaba qozonishni istaymiz. Biz intilgan marom va barqarorlikka erishdik. Hozirda g‘ayrat-shijoatimiz (energiyamiz) eng yuqori nuqtada», — deya Xauning so‘zlarini keltiradi UYEFA rasmiy sayti.
Jamoalar o‘rtasidagi ilk uchrashuvda «Nyukasl» raqibga hech qanday imkoniyat qoldirmagan va Gurban Gurbanov shogirdlarini 6:1 hisobida mag‘lub etgan edi. O‘sha bahsda Entoni Gordon o‘z hisobiga «poker» (bitta o‘yinda 4 ta gol) yozdirib qo‘ygandi.
Musobaqaning umumiy bosqichida ushbu jamoalar tegishlicha 12 va 22-o‘rinlarni egallashgan.
