Janni Infantinoning FIFA prezidenti lavozimiga saylanganiga 10 yil to‘ldi. Shu munosabat bilan O‘zbekiston futbol assosiasiyasi birinchi vise-prezidenti Ravshan Ermatov Infantino rahbarligidagi o‘n yillik davrni tahlil qilib, amalga oshirilgan islohotlarning o‘zbek futboliga ta’sirini yuqori baholadi.

Ravshan Ermatovning ta’kidlashicha, Janni Infantino boshqaruvi ostida futbol chin ma’noda global sport turiga aylangan va rivojlanayotgan davlatlar uchun keng imkoniyatlar eshigini ochgan:

“O‘zbekistonda ushbu davr ichida sezilarli o‘zgarishlar amalga oshirildi. FIFA Forward dasturi doirasida mamlakatimizda to‘rtta zamonaviy mashg‘ulot maydoni qurib bitkazildi, stadionlar infratuzilmasi jahon standartlariga muvofiq rekonstruksiya qilindi. Bu esa milliy futbolimizni yangi bosqichga olib chiqish uchun poydevor bo‘lib xizmat qildi”.

O‘zbekiston 2024 yilda o‘z tarixida ilk bor futzal bo‘yicha Jahon chempionatiga mezbonlik qildi. Ermatovga ko‘ra, ushbu mezbonlik xalqaro turnirlarni eng yuqori saviyada tashkil etish borasida O‘zbekiston uchun muhim tajriba bo‘lgan.

Shuningdek, eng muhim islohotlardan biri sifatida Ravshan Ermatov Jahon chempionati ishtirokchilari sonining 48 taga kengaytirilishini e’tirof etdi.

“Eng muhimi, Jahon chempionati ishtirokchilari sonining 48 taga kengaytirilishi O‘zbekistondagi 38 milliondan ortiq insonning orzusini ro‘yobga chiqardi va butun xalqimizni yagona maqsad atrofida birlashtirdi”, deya ta’kidladi O‘zbekiston futbol assosiasiyasi birinchi vise-prezidenti.

Ma’lumot uchun, Janni Infantino 2016 yilning 26 fevralida FIFAning to‘qqizinchi prezidenti sifatida ish boshlagan.