"Nyukasl" bosh murabbiyi Eddi Xau Chempionlar ligasi 1/8 finalining bo‘lajak qur’asi haqida o‘z fikrlarini bildirdi. Ushbu bosqichda "qarg‘alar" yo "Chelsi", yoki "Barselona" jamoalaridan biriga qarshi maydonga tushadilar.
"O‘ylaymanki, biz shunchaki "Manchester Siti" bilan to‘qnash kelmasligimizdan minnatdormiz. Natijalarni intiqlik bilan kutyapmiz. Qizig‘i shundaki, biz bir hafta ichida "Chelsi"ga qarshi uchta o‘yin o‘tkazishimiz mumkin. Ularga qarshi o‘z uyimizda ajoyib o‘yin o‘tkazgandik — menimcha, o‘shanda juda yaxshi harakat qilganmiz. Men ularni hurmat qilaman. O‘sha o‘yindan beri ularda murabbiy almashdi.
"Barselona" bilan ham o‘z uyimizda juda yaxshi o‘ynagandik. Kim tushishidan qat’i nazar, biz uchun bu hayajonli qarama-qarshilik bo‘ladi", — dedi Xau matbuot anjumanida.
Eslatib o‘tamiz, Chempionlar ligasining o‘tish bosqichida "Nyukasl" "Qorabog‘" jamoasini ikki o‘yin natijasiga ko‘ra 9:3 hisobida qiyinchiliksiz mag‘lub etgan edi.
